El 6 d'abril de 1898 amanecía cola pacificación definitiva en Xixón, dempués de cuatru díes de movilización y protestes de les pescaderes. La nueche anterior fuera tranquila y namás que quedaba la guardia civil apostada na casa'l conceyu. El día 2 les pescaderes entamaron una protesta contra la suba d'impuestos al consumu del pescao y'l mariscu. Decenes de muyeres amotinaes ocuparon el cai d'oriente y la contorna de la pescadería. Tamién bloquearon la entrada de la fábrica tabacos, llogrando el sofitu de les cigarreres, que dexaron el trabayu, uniéndose munches a les pescaderes. El númberu de muyeres fue medrando a lo llargo'l día y tomaron la oficina central de consumos y cuásique tolos fielatos, quemando na vía pública tolos documentos, preseos y material qu'había. La guardia civil y la policía llocal, movilizaes pol ayuntamientu, tuvieron qu'afuxir, incapaces de contener a les manifestantes. Entóncenes intervino el batallón Príncipe del exércitu, que tamién tuviera qu'escapar de la furia femenina y abellugase colos guardies y policías en dependencies municipales. Les muyeres, ames de la villa, qu'ardía en puntos de Cimavilla, El Carmen y El Texedor intentaron asaltar la cárcele, onde hebo disparos de pistola. Nesi momentu yá taben na cai obreros portuarios anarcosindicalistes. Les muyeres, contando yá con homes, marcharon haza l'ayuntamientu, onde la milicia fizo dos cargues a la bayoneta. Pero nada paraba a les pescaderes, les cigarreres y los portuarios. Volvieron a producise titoteos y resultaron feríos unos cuantos soldaos. Quemaron la báscula del cai d'Abtao y ocuparon tol centru de la villa. A eso de les diez de la nueche, declarose en Xixón l'estáu de sitiu. El día 3 presentó una ciudá desolada, con bastantes incendios, con tóo pesllao y les víes públiques ocupaes por soldaos, n'aplicación del estáu de sitiu. Llegó a plantegase la intervención de l'armada. Pero les pescaderes y los sos amigos nun se daben. El día 4 el confliutu prendiera n'Uviéu, onde los obreros, con gran protagonismu de los armeros de La Vega, quemaron los centros de consumos. Les autoridaes llegaron a temer que los trabayadores d'esi seutor sacaran armes de la fábrica. Por fín, el día 5 les autoridaes retiraron les medíes impositives y, aparentemente, tóo acabara. Aparentemente porque 1898 significó un finxu pa un movimientu obreru como'l de Xixón, que nun dexó de crecer y tener cada vuelta más fuerza ata la guerra civil.
DdA, XX/5638
No hay comentarios:
Publicar un comentario