Leticia Gondi
Diba corriendo güei pel Muru, mientres pensaba na corriente migratoria que traxo a cientos, a miles de nós equí.
Dexando atrás la mio neñez, monté naquel tren de trayectu inciertu que fuere trazáu va cuantayá pa xuntar el conceyu que me vio espoxigar col que taba esperándome pa veme avieyar. Cuando vini a mediaos de los 90, el camín yá taba fechu.
En Xixón nun tardé n’atopar trabayu, nin tardé n’echar de menos el repentín cambiu d’estaciones nel Altu Nalón. Y a les andorines, glayando col so cantar la pausá agonía de la ñeve na peña, o los témpanos desfaciéndose quedos nel aleru dalgún horru.
Dellos díes asomábame a la ventana que daba a una calle gris, deseyando ver al paisanu en madreñes guardando les vaques na cuadra. Y solo adivinaba el fedor del tráficu. El brillu artificiosu de les lluces de neón. L’estrueldu qu’anuncia’l pasu del camión de la basura.
¡Por qué m’alloñaría tantu del ríu onde deprendí a nadar contra corriente! ¡Por qué nun veo namás que moles de formigón emerxendo d’estos mares d’asfaltu yermu!
Delles nueches d’insomniu quédome quieta na cama buscando nel breve silenciu de la madrugá l’ecu llonxanu de los cencerros, l’arrullu del vientu xiringando les castañales.
O dexo que l’orbayu moye’l mio rostru, y pesllo los gueyos imaxinando que nun toi equí, plasmá delantre d’un semáforu colloráu que nun acaba de camudar, sinón corriendo per aquellos caleyos cola tanca d’aluminiu y porcelana blanco desconchá, y la lleche caliente acabante catar.
De camín a casa mio güela, facía una pará y tragaba a les escondidielles d’una vegada, dexando en los mios llabios la buelga del delitu qu’en nun tardando diba traicioname.
Si nun morrí de pena en Xixón, fue pola so sablera. Voi dicite.
DdA, XX/5580
No hay comentarios:
Publicar un comentario