LOS ARCHIVOS DEL CONDE DE REVILLAGIGEDO

David M. Rivas

Álvaro Armada, conde de Revillaxixéu, acaba de vender el so archivu al ministeriu de cultura español por dalgo más de 6 miyones d'euros. Esi archivu, declaráu "bien d'interés cultural" en 2008, cuenta con un miyón de documentos fundamentales pa estudiar la historia d'Asturies, España, Méxicu y Estaos Uníos. Tien documentos del mesmu adelantáu de La Florida, Pedro Menéndez d'Avilés, de la primer metada'l XVI, asina como tamién de les cases nobiliaries de Ramiri de Xove, Güemes, Ríos, Omaña, y Armada, y de los condaos de Revillaxixéu, San Esteban del Mar y Santa Cruz de Ribadulla. La tasación del archivu, fecha hai diez años, diera como preciu 37 miyones d'euros. El conde güei titular desplica na prensa qu'Asturies nun aprovechó la oportunidá que tuvo pa facese con ello. L'ayuntamientu de Xixón aplaude que l'archivu quede en manes públiques, cosa que ye bona, mientres qu'el gobiernu d'Asturies va solicitar una copia dixital del mesmu. Puede que nin Xixón nin Asturies tuvieran perres pa comprar los fondos, nun voi ponelo en duldia, y, entós, meyor ye que tea en Madrid que nuna colleición privada de Nuea York, Riad o Moscú. Pero lo de los nuesos fondos ye de verdadera vergoña. Por exemplu: los archivos del Conseyu Soberanu d'Asturies y Llión, robaos polos franquistes y llevaos a Salamanca, tan agora, por esos alcuerdos ente partíos, en manes del gobiernu catalán. Y equí naide gutia y menos que naide l'executivu.

DdA, XIX/5.448