David M. Rivas
Güei fala na prensa Pedro de Silva sobro los paralelismos ente l'actual guerra d'Ucraña y la guerra civil. Y pon, con aciertu, qu'una de les semeyances ye la xeneralización d'una táutica de guerra contra la población civil, la que güei desendolca Putin como hai cuásique un sieglu fixera Franco. Y pon, ¿cómo non?, un nome: Guernica. En fin. Pedro de Silva fue presidente d'Asturies ente 1983 y 1991, y ye, seguramente, de tolos animales políticos asturianos, el menos animal. Amás, ye de Xixón. ¿A qué vien esto? Pues a lo de Guernica. Xixón padeciera un bombardéu diariu, día tres día, dende la mar, cañoneada pol Almirante Cervera, "el chulo del Cantábrico", ensín misericordia. A un tiempu, día sí y otru tamién, yera bombardeada dende l'aire por l'aviación alemana, pola Llexón Cóndor de Hitler. Y Xixón yera una ciudá desmilitarizada, ensín bateríes antiaéries, ensín marina artillada. Y asina, día tres día, pasó cuásique un añu. Les escenes, recoyíes por fotógrafos, son tan abondoses como tristes y crueles. Pero hai más. L'Infiestu y Colunga foran arrasaes pola aviación nazi. Y de Cangues d'Onís nada quedara en pié. Nada. La vieya capital, símbolu d'Asturies como pocos, fora arrasada polos alemanes dende l'aire. Les ordes tamién veníen de Burgos, del sanguinariu paticortiu, el que, sigún Silva, adelantrárase a Putin. Pero un xixoniegu que fuera presidente d'Asturies, nun alcuentra otru exemplu que Guernica. "Asturias ta n'ayén/ta tatexando,/diz como ayenas/las pallabras suas", escribiera Fernán Coronas. Marx, por citar un autor seguramente más valoráu por Silva, falando del "tar n'ayén", oseya, tar "allienáu", ye muncho más cruel.
DdA, XVIII/5.290
No hay comentarios:
Publicar un comentario