David M. Rivas
Un bon detalle del gobiernu asturianu y de dalgunos conceyos el de llantar un texu n’alcordanza de les víctimes de la covid. El texu ye l’árbole sacráu de los ástures y tamién de los demás pueblos del fisterre atlánticu. Los reis de la islla de Man yeran coronaos enbaxo un texu nel monte Snaefell: “dende agora, siempres vas cayer de pie”, dicíen los consacrantes nes tres llingües del país, el célticu, el xérmánicu ya’l llatín. Los guerreros asturianos llevaben biltos de texu na so impedimenta pa suicidase con ellos enantes de cayer presos del enemigu. El texu ye inmortal, capaz de sobrevivir alimentándose de sigomesmu. Espoxiga pa dientro’l tueru cuando necesita siguir viviendo y nun tien manera nel esterior. Por eso embaxo les sos rames se cellebren los conceyo abiertos, por eso los templos cristianos se construeron al delláu del vieyu árbole de los muertos, por eso los nuesos antepasaos tan interraos al pie d’un texu. Inclusive Ovidio diz que “hai un camín que desciende a la solombra los texos, que lleva a les moraes infernales; pellí baxen les solombres de los muertos y les visiones de los que recibieran los honores del sepulcru”. Hai un vieyu canciu inglés que diz: “les vides de tres perros, la vida d’un caballu/les vides de tres caballos, la vida d’un home/les vides de tres homes, la vida d’un aigla/les vides de tres aigles, la vida d’un texu/les vides de tres texos, el tiempu d’una era/siete eres dende la creación ata’l día’l xuiciu”.
DdA,XVI/4556
No hay comentarios:
Publicar un comentario