David M. Rivas
Lo
de Ribó nun tien nome. Argumentar que los problemes de la sanidá
catalana tan motivaos porque munchos pacientes d’otres comunidaes van a
operase a Cataluña ye una barbaridá que lu equipara a los que dicen lo
mesmo n’Andalucía, Murcia o Madrid sobro’l colpasu sanitariu por culpa
de los inmigrantes. ¡Mira ti aú llegara un vieyu dirixente comunista!
Amás nun ye verdá. Nun diera nin un datu. Paez ser que Cataluña, con
especialidaes mui concretes y punteres, arrecibe pacientes d’otros
sitios, que representen el ún por cientu del total. Amás, cuando un
asturianu o un aragonés son trataos en Cataluña, aquella comunidá
arrecibe una tresferencia dende Asturies o dende Aragón. Puede ser que
dalguna comunidá deba perres a Cataluña, pero eso poco tien que ver
coles llistes d’espera. Y, entrugo, ¿ye que cuando va ún de fuera
cuélenlu na llista? La realidá ye que Cataluña ye, con Madrid, les
comunidaes que más recortaron y privatizaron na sanidá dende hai una
década. Guy Standing, de la Universidá de Llondres, autor d’un llibru
mui interesante sobro la renta social, diz qu’hai una nueva clase
social, los “atávicos”, qu’atienden a retóriques fáciles que faen
culpables de tolos males a fuerces esternes. Nunca pensé que xente como
Ribó llegara a calentar asina a la carne de cañón de la xenofobia, a los
grupos menos formaos d’esti modelu global de precarización y
desregulación.
DdA, XV/4361
No hay comentarios:
Publicar un comentario