"REZA POR LA NOCHE Y NO CENES, Y VERÁS POR LA MAÑANA QUÉ FAME TIENES"

David M. Rivas

Pa mexar y nun echar gota. Lleo un artículu de Filippo Priore y nun salgo del shock, inclusive coles mayúscules coles qu’escribe, que yá nun se lleven nin nos mangos de los paragües. Esti asturianu de pro, don Filippo, ye brutal, igual de gran inxenuidá, igual tontu. Entitula’l so escritu asina: “Lección contra las ensoñaciones. Asturias ante los Reyes y la heredera de la Corona española”. Nun sé por qué nun pon “Española” con mayúscula inicial. “Nuestra fidelidad inquebrantable a la Corona y a la unidad de España nos avalan para ser dignos merecedores de ver cumplidas nuestros deseos, que no ensoñaciones”. Nun entiendo por qué nun pon “Unidad” con mayúscula. “La nuesa fidelidá inquebrantable…” Pues la historia diz otra cosa. Igual ye que la familia de don Filippo siempres tuviera fidelidá inquebrantable y piensa que les demás vieyes families asturianes mamamos de lo mesmo. ¿Y qué diríen los grandes mayestros antropólogos sobro’l pensamientu máxicu? “Si soi lleal, servil, fiel, creyente… ¿cómo ye que me pasa esto?”. Al enxebre asturianu don Filippo Priore, de fidelidá inquebrantable a la Corona, al Rei, a la Princesa, a la Unidá… ¿qué-y voi dicir? Igual que vivan les cadenes. Yá d’aquella, cuando Fernando VII, nun mos fuera mui bien a los asturianos. Pero voi ser más cenciellu y remitime a la tradición pupular del país, que de xuru que don Filippo, que tanto sabe del espíritu d’Asturies, coñoz: “reza pola nueche y nun cenes, y verás pola mañana qué fame tienes”.

DdA, XV/4318