Lleo güei un artículu de Luis Rubio sobro la polémica de los sublevaos en 1936 nel cuartel Simancas de Xixón (Gijón), nel que basa l'argumentación pa mantener el monumentu en que son "héroes". Pa dar fuerza llóxica recurre al diccionariu, nel que lleemos qu'un héroe ye "quien realiza fazañes estraordinaries o ye protagonista d'un fechu heroicu, más allá de lo razonable". Diz tamién qu'héroes fueron los soldaos del Conseyu Soberanu n'El Mazucu, como los del Alcántara n'El Rif o los de Balar en Filipines. Yo entiendo que la heroicidá, dende la lliteratura clásica griega, supón una xunción de dos carauterístiques: la fazaña estraordinaria y la razón ética. Yo nun duldio de que los homes del Simancas fueran valientes, como lo fueron los d'El Mazucu y los pirates de Drake. Toi seguru de que los alemanes que defendieron Berlín ata'l final, nazis ideolóxicamente la mayoría, tamién fueron tan valientes como los últimos españoles de Filipines, pero resulta que nun tienen un monumentu na capital alemana nin fueron veneraos por una dictadura de cuarenta años. La heroicidá y l'honor sólo son primes remotes de la valentía. Qu'un home muerra por una causa puede xustificar la so biografía per non necesariamente la causa.
DdA, XX/5.841
No hay comentarios:
Publicar un comentario