David M. Rivas
Los borbones anduvieron per Somiedu onde visitaron a los vaqueiros y almiraron la so cultura trashumante, escaeciendo nos discursos oficiales los sieclos de marxinación y les normes humillantes del tronu y l'altar contra ellos. Pero, en fín... son tonteríes históriques que nun paga la pena recordar. Más paecía una visita, non a los vaqueiros, sinón a los indios, a los indios de la reserva. Cantó Mariluz Cristóbal una vaqueirada y los periodistes, por calificar de forma moderna a los heraldos del monarca, nun perdieron migaya: "cuando acabó la interpretación, la reina averose rápidamente; ¿por qué?, porque tenía dalgo que la unía mui estrechamente a l'artista: 'a mio güela gustábai muncho la tonada'". Y recuérdome d'aquel día en qu'el rei viome y corriera p'haza min y díxome que tinía dalgo que lu unía muncho a mín: "yo tamién teo dos fíes". Y, respetuosu, yo cumpliera bien: "maxestá, tenemos vínculos más estrechos tovía, que yo tamién soi de calcetos azules". La corte portátile marchara cola música a otra parte y atapez nes valles somedanes. Pero queda la voz de la princesina, que vuelve a estudiar a Gales pero, diz, "echaré de menos Asturies, a la que quiero tanto". Y munchu amor debe tener dalguién pa ser tan sensible pa con un país al que ve dos vegaes al añu dende un estráu. Y, de pasu, señora, una suxerencia pa cuando llegue a Cymru: ya que nun respeta la llingua d'Asturies, faiga a lo menos lo que fixo Carlos de Windsor, príncipe de Gales, que daprendió galés y fixo nesa llingua el so primer discursu, cuando nun yera oficial y contra la opinión de los cortesanos conservadores y socialdemócrates, los sos Mayada y Vigil de casa.
DdA, XVII/4990
No hay comentarios:
Publicar un comentario