David M. Rivas
Yá tan saliendo de los ñeros los primeros miagones, cosa que faen, normalmente, dos selmanes dempués de la eclosión de los güevos. Cerca casa, nun tochu afuracáu de castañar, hai, polo menos, dos paxaros yá grandinos. Como toles rapaces nocturnes, los estríxidos, esporpollen con bastante rapideza y, nidífugos habitualmente, déxense ver posaos a dalgunos metros del nial. El miagón, llamáu tamién fonsu en delles rexones d'Asturies, ye'l compañeru d'Atenea, la diosa de la sabiduría. Ye corriente sentir falar del curuxu o la curuxa d'Atenea, pero trátase d'un miagón, como de fechu reconoz la mesma ciencia, que-y diera como nome "Athene noctua". Les monedes de cursu llegal na dómina clásica ateniense llevaben como imax la d'esti páxaru, símbolu d'Atenea, "la de los güeyos de miagón", como yera reconocía. De fechu, l'epítetu más común qu'Homero-y atribui a la diosa protectora d'Ulises ye'l de "glaucopis", que provién de la raiz "glaux", esto ye, "miagón". Na cultura occidental el miagón representa la filosofía y famosa ye la frase de Hegel nes sos llecciones de filosofía'l drechu: "die Eule der Minerva beginnt erst mit der einbrechenden Dämmerung ihren Flug" (La lechuza Minerva no inicia su primer vuelo hasta que cae el crepúsculo).
DdA, XVII/4888
No hay comentarios:
Publicar un comentario