martes, 22 de junio de 2021

120 AÑOS DEL CAFÉ DINDURRA


David M. Rivas

Güei cumple 120 años el Café Dindurra. Nel impresionante edificiu del paséu de Begoña cola cai Cuadonga, obra de Mariano Marín Magallón, abría les sos puertes el 21 de xunu de 1901. Taba decoráu por doce frescos modernistes d'Alfons Mucha que representaben a los doce menses del añu, pintaos a manu polos artistes Eleuterio Alonso y Zoilo Nogués. Yera un café de clara inspiración parisina, que nun quedaba na fisonomía sinón en tolos sos detalles, dende la cubertería, el cristal y la cacía ata los menús del meudí. Por tres pesetes servíen "omelettes fines herbes, petites constrades beschames, poisson variée, côtelettes de mouton ponme sautée...". Nada d'esi Dindurra queda, nin tansiquier el francés, que, como escribe na crónica sobro la efeméride Arantza Margolles, cola última reforma, la de 2014, tamién apaeciera la tendencia idiomática actual, cuando'l café ye anunciáu como "un espaciu onde pasar les tardes 'after work'". El café, tal y como güei lu conocemos y como ta na memoria de tolos xixoniegos y visitantes, ye'l de la reforma de 1931, dirixía por Manuel del Busto y con decoración de José Morán. Esi café, reconocible anguaño, ye d'estilu modernista alemán, heredáu de les esposiciones universales de Berlín y de Coloña (1926 y 1928), un "art decó" que tanta fuelga dexara na villa y que tan maltratáu fora pola piqueta municipal, mesmo en dictadura qu'en democracia, y víctima de la especulacióin, tamién mesmo en dictadura qu'en democracia. Ye'l café de les columnes que lu identifiquen, l'ellementu de xuru que más emblemáticu. Peles meses del Dindurra pasara la historia de Xixón y del mundiu, dende les tertulies de Melquíades Álvarez o de Pachín de Melás al rincón de los periodistes llocales ata hai bien poco. Ellí comiera Durruti y dizse, "se non è vero, è ben trovato", que nuna d'eses xintes dibuxara pa otros compañeros l'esquema l'asaltu al Bancu d'España de la cai Xovellanos que diba realizar unos díes dempués. Al Dindurra diba yo de pequeñu col mio güelu Manolo y tomaba lleche merengao, y siguí siendo fiel tola vida al llugar. Incluisive ellí, nuna mesa escontra una d'aquelles ventanes de guillotina, una tarde de febreru, supe a los pocos minutos de pasar, de la toma del Congresu por Tejero y los sos guardies civiles en 1981. Un café, una ciudá, un mundiu, una vida.

DdA, XVII/4883

No hay comentarios:

Publicar un comentario