Cómo qu'hai una gran conspiración contra la monarquía? Por favor, un poco de seriedá. Equí nun se ta discutiendo sobro les responsabilidaes d'un tal Juan Carlos de Borbón, non. Equí tamos comprebando que soportamos una monarquía colos últimos raigaños d'absolutismu d'Europa, tres sieclos dempués del nacimientu de la democracia moderna. El Congresu vuelve a denegar la formación d'una comisión d'investigación sobro les trapaceríes del xefe d'estáu anterior, que defraudó fiscalmente yá dempués d'abdicar. El mesmu Tribunal Constitucional, na so sentencia onde declaró inconstitucional l'amnistía fiscal de Montoro, diz que la regularización ye "llexitimar el dellitu". El Congresu declárase incompetente apelando a un tribunal que diz lo contrario. De risión. El casu ye salvar al soldáu Borbón, y pa eso tan los del PSOE y los del PP, col sofitu de los "demócrates" de Vox y los "lliberales" de Ciudadanos. Como yo soi de los que piensen qu'el problema fonderu ye la mesma formación d'España y la so conxénita tendencia al servilismu, dame lo mesmo república que monarquía, anque, por un mínimu respetu a la intelixencia, optaría siempres pola república. Pero, puestos a ser pragmáticos, ata me valdría la monarquía, si ye que ye paragües d'un estáu de bientar y, perimportante, d'igualdá ante la llei. Y, evidentemente, nun ye'l casu: llatrociniu y privilexos. Como tuve la mala suerte d'estudiar y viaxar supe d'otros mundios y d'otres monarquíes, como Gran Bretaña, como Suecia, como Olanda, como Dinamarca. ¡A ver si'l problema ta na dinastía...! Que Juan Carlos I defraude a la facienda, tea fondos en parayisos fiscales y pague les sos coyundes de vieyu verde con cargu al erariu ye normal. Y qu'ata los ñetos chulescos y taurinos vivan de los ciudadanos tamién. Son los borbones. Siempres fixeran lo mesmo, dende Felipe V a Alfonso XIII. Nun se llibra ún. Ata Napoleón lo dixo: "nunca viera familia real tan rastiega como esta". Franco collaboró nel llatrociniu pero veníen bien adoctrinaos previamente. Puede que Felipe VI seya d'otra pasta y que tire más del sangre danés y alemán de la madre que del hispanofrancés del padre. Pero nun se yo... Rápidu y firme colo de Cataluña, entá esperamos que, como capitán xeneral, diga dalgo sobro'l golpismu que pervive nel exércitu y sobro los chusqueros que-y piden la orde pa matar a 26 miyones de persones. Siguimos esperando... Nesta nuechebona va ser, por primera vegada en munchos años, interesante ver na tele al bustu parlante. Igual diz dalgo más d'aquello de "odgullo y satifazión".
DdA, XVI/4702
No hay comentarios:
Publicar un comentario