L’arquitectura románica y gótica tan enllenes de figures que, col pretestu de censurar los vicios y los pecaos, lo que los constructores y canteros pretendíen yera criticar la vida llicenciosa del cleru y de los nobles ensín qu’estos, que yeran los que pagaben, se dieran cuenta. Así alcontramos a monxes copulando con xabariles, a frailes n’actitú amorosiega ente ellos, a cardenales sodomizaos… Pero, evidentemente, dengún d’ellos podía dase por aludíu, anque más d’ún lo pensara. Pero cosa estremada ye lo qu’alcontramos nun capitel esterior de la catedral de Coloña. Podemos ver con claridá a un home col culu al aire n’actitú d’autofelación. Esi capitel ta xustamente enriba del nome de Konrad von Hochstaden, l’arzobispu. Los masones de Coloña quixeron dexar na piedra esa venganza como rempuesta a que l’arzobispu ordenara xubir les tases aplicaes a la cerveza pa sufragar los gastos de construcción de la catedral mesma. Nun sé lo que pensaría Von Hochstaden cuando vio la composición, si ye que se diera cuenta porque la figura ta a cierta altura, pero, si ye que la viera, aplicando aquello de que “prudentia dicitur genitix virtutum”, prefiriera quedar calláu.
DdA, XVI/4501
No hay comentarios:
Publicar un comentario