David M. Torres
Más anécdotes d’otros díes. Unamuno fue presidente del Ateneo de Madrid ente’l 8 de xunu de 1933 ya’l 29 de mayu de 1934, tres la dimisión del asturianu Augusto Barcia. El secretariu yera José Prat. Cincuenta años dempués Prat yera presidente ya un asturianu, yo, secretariu. El casu ye que daquella yera consociu Joaquín Pérez Madrigal, masón, diputáu del Partido Radical Socialista y de la banda del republicanismu más anticlerical. Nel parllamentu yera un saboteador, un francotirador, talamente como se definía a sigomesmu. Yera un “xabaril”, en mui acertada espresión d’Ortega. Entrara una tardi nel Ateneo y alcontrárase con Unamuno. Amosando un alfiler de solapa cola cabeza d’un xabaril dixo: “mire, don Miguel, yo soi un radical, non como vusté y tolos apaniguardaos d’Azaña”. El presidente contestó: “tea curiao, illustre consociu Pérez Madrigal, porque la bioloxía dizmos que, con frecuencia, el xabaril dexenera en gochu”. Pallabres profétiques. Pérez Madrigal acabó na CEDA y, más sero, a les ordes del golpista Mola en Pamplona. Dempués acompangó a Cabanellas y fora’l redactor del so famosu manifiestu como xef de la Junta de Defensa. Dirixó Radio Nacional, la radio de Franco qu’emitía dende Burgos. Afiliárase a Falange Española y acabó nel catolicismu más integrista. Fora un gran delator de masones na posguerra. Entamando una tradición que llegó a nosotros, obtuvo’l títulu de drechu “por méritos patrióticos”. Lo dicho: Unamuno profetizó la evolución biolóxica del diputáu xabaril.
DdA, XVI/4465
No hay comentarios:
Publicar un comentario