¿QUE LA SANTINA ECHÓ UNA MANO CUANDO LA BATALLA?

 

Ismael María González Arias

«Toi del respetu hasta les narices. Dende críu too yera respetar a los nuestros mayores. Por más que, dalgún d’ellos, nun mereciera respetu dalgún. Pero, como yera mayor, yá yera de respetar. Como yeren de respetar los santos preceptos de la santa madre ilesia. Cuando ellos, los de la institución, yeren los primeros en non respetalos. Los de la Salle intentaron que lo aprendiera a hostia llimpia. Y nun yeren hosties consagraes. El cura de la nuestra parroquia del barriu, con otres artes, tamién lo intentó. Polo menos hasta que se fugó con una casada. Un escándalu guapu pa un barriu nel que nun solía haber más que noticies de güelgues. Agora, polo que veo, piden respetu los terraplanistes, los que dicen que venimos d’Adán y Eva, y los de tola vida, los que siguen insistiendo en que la virxen yera virxen y que la santina de Convadonga, que ye piquiñina y galana, ayudó pa echar a los moros y hai que siguir tirando d’ella pa echalos una vuelta más.

Na catedral de Chartres había un lletreru que dicía: “N’oubliez pas que vous êtes dans la maison de Notre-Dame”. En casa la virxen. Nada menos. Como pa olvídalo. Menudu negociu que tienen ellí montáu dende la edá media. Ellí se venera la Sainte Chemise: la ropa interior que la virxen usaba de la que tuvo al críu. Parez ser que nun podría haber reliquia más íntima. Pero, non. Chartres yera munchu Chartres y sigue siéndolo. Tamién se venera ellí un pequeñu relicariu que recuerda más que nengún otru en qué se convirtió nuna época’l nogociu de les reliquies. Si de Xesús cuenten qu’ascendió a los cielos, taba complicao tener una reliquia d’él que quedara en tierra. Pues Chartres tienla: le Saint Prépuce. Eso ye, por mui poco francés que sepáis, entendístislo a la primera: el santu prepuciu del nuestru señor Xesucristu. Lo único que quedara en tierra enantes d’ascender. Nun ye broma. Chartres yera lo más de lo más. ¿Sigue habiendo xente que crea estes tochures? Hailo. Si crees qu’esi prepuciu yera del que yera, ¿cómo nun vas creer que la tierra ye plana?

Pero, por favor, nun me pidir que lo respete. Por una razón simple: ellos, los sos defensores, enxamás respetaron lo que yo pensara, lo que yo sintiera, colo que yo disintiera. Asina, dende la perspectiva del folclor, visité Chartres y sigo visitando Covadonga. ¿Que la santina echó una mano cuando la batalla? Venga, ho, lo que digas. ¿Qué tá ellí enterráu Pelayu? Si home, sí. Y la muyer y los fíos y un primu carnal que morrió na batalla. ¿Qué ye la cuna d’España? Nun me jodas, nun sabía nada. ¿Qué si tires una moneda al charcu d’agua cáseste nel añu? Descarao, voi probalo».

EL COMERCIO