David M. Rivas
Pilar González del Valle da una clas d'historia nel pregón de la feria taurina de Xixón que revoluciona tola historiografía medieval asturiana. Afirma qu'Asturies ye'l berciu de les fiestes taurines, como se desprende de que na corte d'Adefonso II, primer terciu'l sieglu IX, había corríes tolos díes. Supongo qu'inclusive sabrá los nomes de los toreros y puede que los de los banderilleros tamién. Ye de suponer que, cuando espublice'l testu nuna prestixosa revista académica, detallará les referencies documentales con precisión. Tamién ye d'esperar que, una vegada conocíos tolos pormenores, l'ayuntamientu de Xixón financie un par de tesis doutorales sobro l'asuntu, yá que tamos escontra un descubrimientu d'importancia soberana, especialmente si tenemos en cuenta que les fontes de la época son escoses, mui desperdigaes y cuásique denguna con tantu detalle como la qu'ella alcontrara. Lo raro ye que na so disertación, González del Valle escaeza que Xovellanos escribe que nunca los toros fueron fiesta popular n'Asturies y que sólo nun par de ciudaes conocíen l'espeutáculu. Pero, caro, tóo tien desplicación porque, a la fin, ¿quién yera Xovellanos sinón un babayu ensín llectures nin illustración y con una hermana, Xosefa, qu'escribía n'asturiano, un idioma que nun esiste? Tampoco fala la erudita de la enorme documentación antitaurina asturiana dende mediaos del XIX, con Clarín como meyor esponente, y'l movimientu antiflamenquista y antitaurín que naciera, precisamente, en Xixón, con un finxu notable na manifestación de diez mil persones nos entamos del XX cuando les fiestes de Begoña, encabezada pol mesmu reutor de la Universidá d'Uviéu. Lo raro ye que doña Pilar nun cayera en que la principal cai del enanche burgués de la villa ye Corrida, evidentemente, n'honor a la "fiesta" y al so enorme raigañu popular.
DdA, XIX/5.417
No hay comentarios:
Publicar un comentario