RECUERDO DE HORACIO FERNÁNDEZ

David M. Rivas

David M. Rivas

Lleo na prensa qu’ayeri, cabudañu d’Horacio Fernández Inguanzo, cincuenta persones aconceyaron nel cimenteriu d’El Sucu pa recordalu. Yo conociéralu yá de vieyu. Pasó dalgunos branos en Quintes, nel conceyu de Villaviciosa. Andaba mal y necesitaba pasear en llano y l’aire la mariña viníai bien. Yo taba en Quintueles, a poca distancia. Pichi, un mineru de Tiuya, amigu de mio pá, presentómelu. Diba yo en moto dende casa pa tar con elli y cola muyer un ratiquín. Tomábamos un par de botellines y charrábamos. Pasé con elli munches tardes y prestábame. Entrugábame muncho d'economía. Dicía que, pa ser comunista, sabía poco d'ello. Dicíame que nun tinía lleyío muncho de Marx pero que sí sabía muncho de les necesidaes de la xente. Y cuntaba... Pa un xoven profesor como yo yera entóncenes, aquelles tardes en Casa Kiko yeren escuela. Tamién falamos muncho de relixón y de coses trescendentes. En política tábamos d’alcuerdu en poques coses, pero sí nes fundamentales. Que la xente lu conociera como “el paisano” yá diz muncho. Yera d’una historia exemplar, pero, como tóos y más los d’aquelles dures dómines, con solombres. Recuerdo particularmente cuando me faló de les barbaridaes que diera por bones porque, honradamente, pensó que nun había otra. Falome de les detenciones y de que nunca cantara. Nunca me faló de les coses truculentes nin se fixera l’héroe. Horacio defendió qu’Asturies fora Asturies y non un principáu, la consideración de nacionalidá histórica y la oficialidá del asturiano, discrepando d’un PCE carrillista etnocida y vendíu a otros intereses. Porque, evidentemente, yera “un paisano”, a lo menos pa mín, esi par de branos que tratara con elli.

DdA, XVI/4415